કલ્પના...

 કલ્પના...

વેરાન જંગલો વચ્ચે 

ઊંચા બનીને ઉભવું

શું એ પર્વતનું ગૌરવ છે..?

કદાચ મજબુરી પણ હોઈ શકે

તેનું અસ્તિત્વ એટલે નરી એકલતા....

સાગરનું તપીને

વરાળ બનવું

શું એ બાષ્પીભવન છે...?

કદાચ સુરજની કોશિશ પણ હોઈ શકે

સાગરને આકાશની સફર કરાવવાનું....

આકાશમાંથી તારાનું

ખરી પડવું

શું એ એની ગફલત છે...?

કદાચ અંતિમ ઈચ્છા પણ હોઈ શકે

અફાટ ધરતીનું કફન ઓઢવાનું....

વૃક્ષ પરથી પર્ણનું 

ખરી પડવું

શું એ વૃક્ષનો નિર્ણય છે...?

કદાચ એ પાનખર પણ હોઈ શકે

પુન:જન્મ  લઈને નવજીવન જીવવાનું ...

લીલાછમ ઘાસ 

પરની જળબુંદ 

શું એ સાચે ઝાકળ છે...?

કદાચ એ ઘાસનું આંસુ પણ હોઈ શકે

દુઃખ ભારોભાર વાદળે નહિ બંધાયાનું...

નીતા.શાહ.

લાગણી

 લાગણી


નામ ક્યાં આપી શકાય  કેટલાક સબંધોને

છતાં બેનામ બંધાય છે આ લાગણી

ક્યારેક હસાવે તો ક્યારેક રડાવે

તો પણ ઝન્નતની સેર કરાવે લાગણી...

ક્યારેક ઉભરાઈ ઉઠે  હૃદય વાટે તો

વહેતા ઝરણા સમી આ લાગણી

ક્યારેક મનમાં ધૂંધવાતી ને છુપાતી

પ્રિયજનના સુખે હસી પડે લાગણી

ભલે ને હોય ગમે તેટલા કોસો દુર

નિકટતાનો અહેસાસ કરાવે લાગણી

એકમેકને  જોડી રાખતી આ કડી

જીવંત રાખે એકમેકને આ લાગણી...

નીતા.શાહ.