ગરબા :૧,૨,૩......

ગરબો 1

રાગ: મુખડાની માયા લાગી રે…

દિવડાની જ્યોત તારી રે,

માં અંબા વ્હાલા…(2)

જ્યોત તારી ભરી આંખે,

શક્તિ ફૂટી અંતરયાળે…(2)

અસતે જ્યાં સત ભારે રે,

માં અંબા વ્હાલા..(2)

દિવડાની જ્યોત…

ગોળગોળ ગરબે ઘુંમતાં,

સાથે ત્રણ તાલી લેતાં… (2)

ગર્ભદીપ શીરે મુકતાં રે,

માં અંબા વ્હાલા… (2)

દિવડાની જ્યોત…

ગર્ભદીપે છિદ્રો નાનાં,

છલકાવે તેજ ‘મા’ ના, (2)

ગગને ટમટમતાં તારા રે,

માં અંબા વ્હાલા… (2)

દિવડાની જ્યોત…

પૂર્ણ જગની જનની તું,

ઘણું ખમતી ધરતી તું, (2)

આંખે અમી હું તો ભાળું રે,

માં અંબા વ્હાલા… (2)

દિવડાની જ્યોત…

નારી હું ય, નારી તું ય,

નારી વત્તા શક્તિ બેય,(2)

શક્તિ કેરી જ્યોત ભાલ રે,

માં અંબા વ્હાલા… (2)

દિવડાની જ્યોત…

વેલ વિશર સખીઓ સારી,

બેઠાં ગરબે ગીતો ગાતી, (2)

આરાધ્ય માં ગબ્બરવાળી રે

માં અંબા વ્હાલા… (2)

દિવડાની જ્યોત…

નીતા.શાહ

ગરબો 2

રાગ: મીઠાં મધું ને મીઠાં..

અંબા દુર્ગા ને ‘મા’ કાળિકા રે લોલ

જગમાં છે એનો જયજયકાર રે…

નવલી નવરાત્રી સખી આંગણે રે લોલ..

આભા ચમકતી ‘મા નાં નેણમાં રે લોલ,

ભાલે કુમકુમ કેરી ભાત રે...નવલી

નવરંગ ચુંદડી ‘મા’ ને શોભતી રે લોલ

ચુંદડીમાં તારલાં અપાર રે… નવલી

પાયે રણઝણતી ‘મા’ ની ઝાંઝરી રે લોલ

જુઓ ચાલે ચમકતી ચાલ રે… નવલી

જગનો આધાર મારી માવડી રે લોલ

કરશે એ પાપનો વિનાશ રે… નવલી

ફેશન પરેડ ચાલે ગરબામાં રે લોલ

ક્લબોનો ધીકતો વેપાર રે...નવલી

લોકો ક્લબોમાં શું શોધતાં રે લોલ

સેલ્ફી ક્વીન બને નવલી નાર રે… નવલી

ગરબો ખોવાઈ ગયો શહેરમાં રે લોલ

ગોતો ઝટ એને ગામેગામ રે… નવલી…

અંબા દુર્ગા ને ‘મા’ કાળિકા રે લોલ

જગમાં છે એનો જયજયકાર રે

નવલી નવરાત્રી સખી આંગણે રે લોલ…

નીતા શાહ

ગરબો- 3

(રાગ: અમી ભરેલું અંતર જેનું)

અંબાજીનું મંદિર ભરિયું, ભક્તો હકડેઠઠ

ભાદરવી પૂનમે કરે પગપાળાં, અંબાનો હુકમ

   ગામેગામથી ભક્તો આવે

   માડીનો જયઘોષ બોલાવે

બારે મહિના વાટડી જોતાં, ક્યારે આવે પૂનમ

માડીનાં પાવન દરશન કરીને, પામું નવજીવન

   માડીનાં ચાચર ચોકે

   દિવા બળે સાતમે કોઠે

પગલે પગલે કુમકુમ ખરે ને, મુખડું ગુલાબી થાય

કુમકુમ કેરા ચાચર ચોકે, સૌના પાપ ધોવાય

   નવ ગજની ધજા ચડાવે

   માડીનો ગુંબજ શણગારે

અમી ભરેલી આંખો ‘મા’ ની, અંતરમાં ઉતરી જાય

આગ ભભૂકતી નજરું મળે તો, માફી ત્યાં મંગાય

   કાળુંધોળું સઘળું જાણે

   અસતે જ્યાં સત ભારે…

અંબાજીનું મંદિર ભરિયું, ભક્તો હકડેઠઠ

ભાદરવી પૂનમે કરે પગપાળાં, અંબાનો હુકમ….

નીતા શાહ

.

સોનેટ [મોબાઈલ]

સોનેટ "મોબાઇલ"

 બલિહારી તારી મગજ કસવા ફોન ચરખો
 બચાવે ક્યાં એ તો સમય સરતો રેત સરખો

વહે છે સંદેશા અવિરતપણે વોટ્સપ મહી
 ઉખાણાં સુવાક્યો અધધ ઢગલાં રાત'દિ અહી
 

કટાણાં ચ્હેરાંઓ નજર વસતાં સુંદર રમે
 મળો જો મોઢાંમોઢ દિવસભર ખાવું ય ન ગમે

કવેળા વેળાએ સતત ઉદ્યમી રાખતું ફરી
 જરા એ વાગ્યોને સતર્ક બનતી ઇન્દ્રિય નરી

 કરે એ નૌટંકી નિત નવિન ખોલે રહસ્ય એ
 નિહાળે વીડીયો રમત રમતાં પોકર બધે
 

ઘણું નાનેરું આ જગત બન્યું છે સાવ જ કને
 બન્યાં આ જુવોને સ્વજન કડવાં દૂર જ જને
 

અહો દેવો-દેવી દરશન કરો વંદન કરી
 થશે ખાલી મંદીર દ્વિજ સઘળાં યાચક ફરી


  નીતા શાહ

વિદાય ગીત ...લગ્ન ગીત

     વિદાય ગીત

 વ્હાલપની વેલ મારી ધરિત્રી રે જી
 સાજનની પાંખે આજ ઊડતી રે..જી
 એ તો પગલાં ભરે સાસર વાટ રે...વ્હાલપની

માતાની મમતામાં મલકતી રે જી
 સાસુજીની મમતાની આશ રે...વ્હાલપની

 પિતાના હૈયાનો હારલો રે જી
  સસરાજી મુકશે સિરે તાજ રે...વ્હાલપની

 મારા આંગણની આજ દીવડી રે જી
  કરશે અજવાળું પિયુ ધામ રે...વ્હાલપની

 પિયરનું પાનેતર શોભતું રે જી
 સાક્ષાત માં લક્ષ્મીનો અવતાર રે...વ્હાલપની

 મોસાળનો ચૂડલો ખણખણતો રે જી
સૌભાગ્ય મંત્ર ફૂંકે કાન રે...વ્હાલપની

મેં તો વળાવ્યું ઘરનું તોફાન રે જી
 મુક્યાં સ્મરણો  શેરીમાં આજ રે...વ્હાલપની

  નીતા શાહ

ગીત...બેના એક વાર મહિયર આવજો રે ઓ બાઈસાજી...

બેના એકવાર મહિયર આવજો રે ઓ બાઇસા’જી

તમે જમાઇ’સાને ભેળાં લાવજો રે ઓ બાઇસા’જી

આંખ્યું સે રાતી, વાટ્યું સે લાંબી

પિયરની પ્રીતડી, વીરાએ ચીતરી

ઓલુ જનનીનું વેણ નવ ભુલશો રે ઓ બાઇસા’જી…. બેની એકવાર

અમે મઘમઘતી વાની રાંધશું રે ઓ બાઇસા’જી

અમે સીસમનાં ઢોલિયાં ઢળાવશું રે ઓ બાઇસા’જી

મનગમતી વાનગી, વાત કઉ ખાનગી

લીલવાં કચોરી, સાથ પાણીપુરી

ઓલી પૂરણપોળી નવ ભૂલશું રે ઓ બાઇસા’જી… બેની એકવાર મહિયર

અમે બંગડીવાળી ગાડી મંગાવશું રે ઓ બાઇસા’જી

અમે ભાણાભા હાટુ ગાદીયું મેલાવશું રે ઓ બાઇસા’જી

કાંકરિયે જાશું, ભેલપુરી ખાશું

પશુ ને પંખી, ભાણાભા રાજી

ઓલી હોડકાની સેર નવ ભુલશું રે ઓ બાઇસા’જી

તમે મહિયરને મહેંકતું રાખ્યું રે ઓ બાઇસા’જી

તમે પિયરને વ્હાલથી વધાવ્યું રે ઓ બાઇસા’જી

માતાની લાડકી, પિતાની તારલી

વીરાની વ્હાલી, રક્ષા જો બાંધી

ઓલા ભાઇબેનના નાટક નવ ભુલશો રે ઓ બાઇસા’જી… બેની એકવાર મહિયર…

નીતા શાહ

ગીત...દીકરી તો શ્વાસ માબાપનો .....

ગીત “દીકરી ”

(રાગ: પાંદડું લીલુંને રંગ રાતો)

દીકરી તો શ્ચાસ મા-બાપનો

એને કોણ કહે ભારો સાપનો… સાપનો…

અજવાળું શોધું હું તો સધળાં સગપણમાં

મળ્યો મુને આત્મજાનો નાતો… દીકરી તો

દીકરીની બોલી કેવી કાલી ને ઘેલી

પાંચીકે રમતી ક્યાં તો સંતા રે કુકડી

ઘરઘરતાં રમતાં જોને મુગ્ધા બની એ તો

ઉદ્યાનને રાખે એ મહેંકતો… દીકરી તો

નાનકડી દિવડી બેઉ ઘરને અજવાળે

બેઉ ઘરનો સેતુ બની સંસ્કાર શણગારે

કર્મ ધર્મ ને સ્નેહનો સાયુજ્ય સજાવે…. એનો..

એનો… પિયુ તો નેણમાં સમાતો… દિકરી તો

અણસમજાયું કે લોક પુત્રજન્મ શેં પૂજે?

પુત્ર કે પુત્રી જન્મે જનનીની કુખે

કેમ રે હણવો કુખે પુત્રીના ગર્ભને?

હાય! અંગજા તો બનશે તારી આંખો… દીકરી તો

નીતા.શાહ.

ગઝલ....અમારી તરસનો દરિયો તું બોલ

ગઝલ
લગાગા ૪

 

અમારી તરસનો દરીયો તું બોલ

નયનને હસાવવા ચહેરો તું બોલ

અધૂરાં એ શબ્દો ઉદાસીન લાગે

હ્રદયનો ખજાનો ઉમળકો તું ખોલ

હસી ઊઠશે આ અમાસી નિશાઓ

તમસને ઉલેચવાં આ તડકો તું તોલ

અવાજનાં નગરે કરો કાન જો બંધ

હ્રદયને ગમે એ નીરવતા તું ઘોલ

હવે હું તો ગાવું ગીતોની ગરિમા

ગઝલનાં આ છંદોમાં પીટિશ તું ઢોલ?

નીતા શાહ

ગઝલ...મારું મારું કર માં અહિયાં તારું શું છે ?

ગઝલ
ગાગાલગા ૩

ગઝલ
ગાલગાગા ગાલગાગા ગાલગાગા 

મારું મારું કર મા અહિયાં તારું શું છે?
મારું મારું આગવું  સહિયારું શું છે?

નફરતોનાં મોરચા તોડી શકો છો?
રાજકારણ, રાજનેતા…સારું શું છે?

કેટલાં ખૂંપે છે ખંજર પીઠમાં અહીં
કેટલાં સળગે છે ઘર, મજિયારું શું છે?

મોહ, માયા, ક્રોધ છૂટે કેવી રીતે?
માનવી છું, હું નથી ઇશ.. ન્યારું શું છે?

ભૂત ખોયો ભાવિની આ આશના ક્યાં?
ખાલી હાથે એ ગયો એકધારું શું છે?

નીતા શાહ

ગઝલ ...વાતોની આડશમાં શું ખોયું છે ?

 

ગઝલ

ગાગાલગા ગાગાલગા ગાગાલગા

વાતોની આડશમાં કહો શું ખોયું છે?

તારી કીકીમાં મારું સપનું ખોયું છે.

સગપણવિલામાં પોતિકાની દૂરતા

આ પોતિકાની ખોટમાં બહુ ખોયું છે

પાંપણભીનાં શમણે છે પ્રિયતમનું સ્મરણ

પ્હોં ફાટતાં રોળાય સઘળું ખોયું છે

આ ક્રૂરતાનો સામનો હસતાં કીધો

આંખો મહી આંસુ દયાનું ખોયું છે

               

જીવનથકી અઢળક તરુ જ્યાં વાવિયાં

તડકે ઊભો, સુખ છાંયડાંનું  ખોયું છે

નીતા શાહ

ગઝલ ....લાગણીની ભીતરે જ્યાં સાર છે

ગઝલ
ગાલગાગા ગાલગાગા ગાલગા

લાગણીની ભીતરે જ્યાં સાર છે 
ટેરવાને સ્પર્શનો આ ભાર છે

વાત રાખી તારી ગમતી પ્રેમથી
સાવ મૌખિક વારતાની ધાર છે 

કલ્પનાઓનો મળે ઢગ સ્વપ્નમાં
સૂર્યકિરણ ફૂટતાં સૌ ઠાર છે

જ્યાં હથેળીને હથેળી જો મળે
ભાગ્યરેખા બેઉની ભરમાર છે 

હું,તું ને આ ખાલિપો જયાં સાથ છે 
બાદબાકી તો સરવાળે ખાર છે

શ્વાસ મારાં જિંદગી આ કોઈની
સ્હેજ પલળું લાગશે ત્યાં પ્યાર છે


નીતા શાહ

# ફાસ્ટ લાઈફ વિશે થોડું સ્લો થિન્કિંગ....

# ફાસ્ટ લાઈફ વિશે થોડું સ્લો થિન્કિંગ



# ફેસબુક આપનો સામાજિક ચહેરો છે, જયારે વોટ્સઅપ આપણો અસલી ચહેરો છે.

# વોટ્સઅપનાં ગ્રુપ મેસેજમાં લાગણી નથી હોતી,સબંધોનું હાજરીપત્રક હોય છે, જે ફોરવર્ડ કરેલા મેસેજને વાહ કહે છે.

# આપણા પોતાના માટે જીવવું એટલે તડકાની વચ્ચે તાપણાને વફાદાર રહેવું,
   વરસાદની વચ્ચે ઝાકળની કુમાશને ટકાવી રાખવી.

# બીજા ને 'હા' કહેતી વખતે જો જો કે તમારી જાતને 'ના' તો નથી કહેતા ને !

# શ્રદ્ધાનો પાલવ અવશ્ય પકડી રાખો પણ શ્રધ્ધાને આત્મવિશ્વાસપૂર્ણ હીંચકામાં
   ઝૂલતી રાખવાની દોરી તો આપણા હાથમાં જ હોવી જોઈએ.

# કોઈ પક્ષીનું  ઈંડું તડાક દઈને ફૂટે અને પક્ષીનું બચ્ચું સહેજ ડોકું બહાર કાઢે
   એ જ પ્રકૃતિનો જન્મદિવસ !

# ઈશ્વરે પક્ષીઓ માટે વૃક્ષોનું સર્જન કર્યું અને આપણે પક્ષીઓ માટે પાંજરા ઉભા કર્યા !



# આપણા શરીરના કયા ભાગમાં મન આવેલું છે એ આપણે
જાણતાં નથી. કોઈ એ આજ સુધી 'મન' ને જોયું નથી.પરંતુ
આ 'મન' આપણા વ્યવહારો અને જીવન નું સ્ટીયરીંગ વ્હીલ
છે, એ સ્વીકારવું રહ્યું.

નીતા શાહ


# ગુસ્સો કેટલો જલ્દી આવે છે એના ઉપરથી માણસનું વ્યક્તિત્વ
નક્કી નથી થતું. પણ એને આવેલો ગુસ્સો કેટલો જલ્દી ઉતરી
જાય છે એના પર એના સબંધનો આધાર રહે છે. માનવ હોવાની
પહેલી નિશાની એટલે માનવસહજ નબળાઈ સાથે જીવવાની
તૈયારી. ક્રોધ,લાલસા,અહંકાર,ઈર્ષા,ઝંખના વગેરે હોઈ શકે અને
એમાં કઈ ખોટું ય નથી.


# પ્રમાણીકતાની કોઈ કીમત હોતી નથી. એ અમુલ્ય છે.સચ્ચાઈ
અર્ધપારદર્શક ન હોઈ શકે .

# સખા, ઘેરી લેને મને તું બનીને ક્ષિતિજ
તારા શ્વાસ ની ખરલ માં
કોણ ઘૂંટી રહ્યું છે ગરલ ?

# પરદેશમાં જયારે કાયદા દ્વારા પુત્રીઓ [વહુઓ] મેળવાય છે.[ Daughter in law કાયદા દ્વારા પ્રાપ્ત
થયેલ પુત્રી ] ત્યારે ભારતમાં તો પ્રેમ દ્વારા પુત્રીઓ [ Daughter in love] મેળવાય છે. મતલબ કે
પારકી પુત્રીને પોતાની બનાવવા માટે પુત્રી સમ પ્રેમ દાખવી કુળવધુ બનાવાય છે.

નીતા શાહ

# વિશ્વાસ એ પ્રેમનું પ્રથમ પગથીયું  છે .


નીતા શાહ

# સંતોષ ની ગેરહાજરીમાં જ સંતાપનું તાંડવ ચાલતું હોય છે.

નીતા શાહ

# બહારનો કુદરતી પ્રકાશ જોવા માટે આંખ આગળ ના દીપકને
જરા ઝાંખો કરો.

નીતા શાહ


# આફતને પણ જયાફત બનાવવા માટે  હિંમતની જરૂર હોય છે.


નીતા શાહ


# જેનો અંત નથી,એવી શુભકામનાઓ ''માં'' જ વરસાવી શકે..!

નીતા શાહ

દ્રશ્ય ઝીલવાં... આછંદાસ

' દ્રશ્ય ઝીલવા'


શિશુને સ્તનપાન કરાવતાં કરાવતાં

ચૂલે રોટલો શેકતી ‘મા’

ગોધૂલીએ બળદિયાને ડચકારતાં ડચકારતાં

મરક મરક થતું ખુમારીભર્યું ખંજન

આંખોમાં વિસ્મયના તારલીયાં ચમકાવતું

શેઢાળું ને નિર્દોષ કિલકારીઓનું ગુંજન

પતંગિયાં જેવું ને પતંગિયાની પાછળ પાછળ

દોડતું એ બચપન

અગણિત અનુભવોની

કરચલીયોનું તેજ

ઝાંખા થયેલ નેત્રદીપ પણ

હાથનું નેજવું કરી દૂરદૂર

દ્રશ્યો ઝીલવા મથતું ઘડપણ

ઝીલવાં હતા સાચુકલાં

જીવંત દ્રશ્યો

પણ

મારા કેમેરાએ બર્હિમુખ લેન્સના

બદલે બહુરૂપીનો લેન્સ

પહેરી લીધો છે!

ક્યાંથી ઝીલાય

સાચુકલાં દ્રશ્યો?

નીતા શાહ

લઘુવાર્તા ''સબંધોનો અજવાશ''

લઘુવાર્તા
''સબંધોનો અજવાશ''

સપનાબેન રસોડામાં ભાખરી બનાવી રહ્યા હતા. રસોડાનો એક એક ખૂણો ચમકતો હતો. પૂર્વમાં સુંદર નકશીકામ વાળું દેવસ્થાન શોભતું હતું.સંધ્યા ખીલી હતી અને જતાં જતાં સૂર્યદેવે ચંદ્રિકા ને ખો આપી હતી. વૈશાખના વાયરા લૂ ઓકતા હતા, અસહ્ય બફારો હતો . દીવાબત્તી થઇ  ગયા હતા,ગુલાબની સુગંધવાળી અગરબત્તી આખા ઘરને ગુલાબમય બનાવતી હતી. સપનાબેન પણ મધુર કંઠે યમુનાષ્ટક  ગાઈ રહ્યા હતા.नमामि यमुना महं ....હાથ ભાખરી વણતા હતા, કંઠ ગાઈ રહ્યો હતો પણ મનમાં ગજબની ગડમથલ ચાલતી હતી . ઘરની, કુટુંબની,બાળકોની,પડોશીની ચિંતા કરનારું પાત્ર એટલે એક ઘરગથ્થું ગૃહિણી ! વિચારતા હતા કે સાગર તો આજે મોડા આવવાના છે, કોઈ મીટીંગ છે ઓફીસમાં, આમે ય શનિવારે તો એમને કામ વધારે જ રહે છે. પણ હમણાં કૃતાર્થ આવી પહોચશેં અને તરત જ જમવાનું માગશે.

ગઈ કાલે કૃતાર્થનો રૂમ સાફ કરતી હતી ત્યારે તેના પેન્ટના ખિસ્સામાં સિગરેટ મળી હતી...એ વાત સાગરને કરવી કે નહિ ? ખુબ ડર લાગે છે વાત કરતા ! ક્યાંક ગુસ્સામાં ને ગુસ્સામાં કૃતાર્થને કંઇ કહી બેસશે તો ? આજના જુવાનજોધ છોકરાને કાંઇક કહેવું એટલે સો ગળણે ગાળીને પાણી પીવા જેવું છે, નહિ તો પછી વાતનું વતેસર થઇ જાય.ત્યાં જ મોબાઈલ રણક્યો. ભાખરી ચડવીને ગેસ બંધ કર્યો ને હાથ લુછી ને ફોન લીધો.
 સપનાબેન:- ''હેલ્લો, હા સ્નેહા મને હતું જ કે હમણાં ફોન આવશે તારો ! કેમ છે તું બેટા ? ''
સ્નેહા- '' હા મમ્મા મજામાં છું. થોડું કામ રહે છે પણ મેનેજ થઇ જાય છે. જસ્ટ ઉઠીને તને ફોન કર્યો. કેમ છે કુકુ ને પપ્પા ? બાકી કોઈ પંચાતમાં ?''
સપનાબેન - બધા મજામાં છે બેટા. કુકુ આવવો જોઈએ હમણા, પપ્પાને મોડું થશે આજે. પંચાતમાં ખાસ કઈ છે નહિ બેટા. હા, મહેશકાકાના દીકરા પૃથ્વીનું સગપણ નક્કી થયું છે. છોકરી આમ તો સારી છે પણ સમય જતાં બધું પરખાય.''
સ્નેહા--'' લ્યે મમ્મા, આટલી મોટી વાત તું મને કહેતી નથી ? હું આજે જ પૃથ્વીભાઈને મેસેજ કરું છું. તારી ભાષામાં વધામણાં તો કરવા જ જોઈએ ને ? પપ્પાની  તબિયત કેમ રહે છે ? સુગર અને પ્રેશર કન્ટ્રોલમાં તો છે ને ? ''
સપનાબેન - '' ગયા અઠવાડિયે જ પપ્પા ના રીપોર્ટસ કરાવ્યા, બધું નોર્મલ છે બેટા. તે સાર્થક જોડે વાત કરી ? કેવો લાગ્યો ?''
સ્નેહા - '' હા મમ્મા, સારો છે, ઓનલાઇન વાત થાય છે ક્યારેક. હવે અમે સારા મિત્રો પણ છીએ.
સપનાબેન-'' મને અને તારા પપ્પાને સાર્થક  બધી રીતે યોગ્ય લાગે છે. સંસ્કારી ને પાછો ભણેલો ય ખરો અને દેખાવમાં તો એકદમ હેન્ડસમ છે.જન્માક્ષર પણ બત્રીસ ગુણાંકથી મળે છે. ગયા રવિવારે એ લોકો આપણાં ઘરે આવેલા ને ઘણી ઓળખાણો ય નીકળી.
સ્નેહા- હા મમ્મા...મને એ ખબર નથી પડતી હજુ મારું ભણવાનું ચાલુ છે ને તમે લગ્નની વાતો કરો છો ? કેમ મને મુરતિયો નહિ મળે ? શું ખામી છે તારી દીકરી માં ? હા, થોડી શ્યામ  અને ઠીંગણી ખરી, તો શું થઇ ગયું ? તું ચિંતા છોડ, થશે ટાઇમ આવે!
સપનાબેન - બેટા, સમયે સમયે બધું થવું જોઈએ, નહિ તો ખાટી છાશ ઉકરડે ફેકવાનો વારો આવે. પણ તને નહિ સમજાય ! કહું એટલું કર ! અને તારું ભણવાનું ક્યાંય બગડવાનું નથી. કેનેડા ભણવા માટે તો મોકલી છે.

સ્નેહા - ઓકે મમ્મા, ફોન મુકવો પડશે મારે. ગ્રોસરી કરવા જવાનું છે ! રૂમમેટ વેટ કરે છે. અને હા, આ મહિને નાસ્તાનું પાર્સલ ના મોકલીશ, બધું પડ્યું છે. પછી શાંતિથી વાત કરું છું. બાય મમ્મા, લવ યુ...!

ફોન મુકીને સપનાબેન પાછા રસોડામાં ગયા.વિચારોનું યુદ્ધ તો ચાલુ જ હતું. બાકીની ભાખરી કરતાં કરતાં બબડ્યા,'' કહેતી ‘તી કે માસ્ટર અહી જ કરાવો, દીકરીને વળી પરદેશ મોકલવાની શું જરૂર હતી ? પણ બાપ-દીકરી બેઉ માને તો ને ? બસ સાર્થક જોડે ગોઠવાઈ જાય એટલે ગંગા નાહ્યા ! છેલ્લું સેમિસ્ટર છે, માસ્ટર પણ થઇ જશે. પી.આર. ની ફાઈલ મૂકી દીધી છે. બધું જોડે પતી જશે. ત્રેવીસમું ચાલે છે એટલે આવતા વર્ષ સુધી પ્રસંગ કરીએ તો પણ વાંધો ના આવે.'' રસોડામાં કામ પરવારીને સપનાબેન હીંચકે આવી ને બેઠાં ને મોબાઈલમાં ગેલેરીમાં જઈને એક પછી એક ફોટા સ્વાઈપ  કરીને જોવા લાગ્યાં અને ભૂતકાળને ફંફોસવા લાગ્યા. હવે તો સ્નેહા કદાચ લગ્ન કરવા જ આવશે અને ફરી પાછી  ઉડી જશે. શું મને ફરી ક્યારેય મનભરીને એની સાથે રહેવાનું નહિ મળે ? બે વરસમાં તો કુકુ પણ આમ જ માસ્ટર કરવા પરદેશ જતો રહેશે ! ને ઘરમાં સાવ સુનકાર છવાઈ જશે...'' એકાએક વિચારોએ એક્ઝીટ કરી જ્યાં ઉપરાછાપરી ડોરબેલ વાગતી હતી. '' આ કુકુ તો આવે ત્યાંથી જણાય ! કોલેજમાં આયો તોય છોકરમત ગઈ નથી.''

રઘવાટમાં સપનાબેને બારણું ખોલ્યું અને સાગરભાઈ એ ઘરમાં પ્રવેશ કર્યો, સોફામાં બેસી ગયાં,પગ લંબાવીને આંખો બંધ કરીને !

હાફળા ફાંફળા સપનાબેને પંખો ફાસ્ટ કર્યો ને પાણીનો ગ્લાસ ધરતાં પૂછ્યું, '' શું થાય છે ? તબિયત તો બરાબર છે ને ? તમે તો મોડા આવવાના હતા ને ?''

સાગરભાઈ- '' અરે, આજે મજા નહોતી લાગતી ને માથું ભારે ભારે લાગતું' તું , એટલે મીટીંગ કેન્સલ કરીને ઘરે આવી ગયો. થોડો આરામ કરીશ એટલે આવી જશે બધું રાગે ! જલ્દી ચા બનાઈ લાવ.''

બબડતા બબડતા સપનાબેન રસોડામાં ગયાં. ચા ને બિસ્કીટ ની ટ્રે લઈને આવ્યાં, '' કેટલી વાર કહ્યું કે હવે વનમાં પ્રવેશ કર્યો તો તબિયતનું થોડું ધ્યાન રાખો. કામનો ભાર થોડો ઓછો કરી નાખો હવે ! બ્લડપ્રેશર ને ડાયાબીટીસ થોડા થોડા સમયે ખબર લઇ જાય છે તો થોડો આરામ પણ કરવો પડે ને ? થોડી વાર પછી ડોક્ટર પ્રજ્ઞેશભાઈને બતાવી આવીએ !''

સાગરભાઈ- ''અરે, સપના એવું કશું જ નથી. આ અમદાવાદની મે મહિનાની ગરમી,આ અંદર એસીની ઠંડક ને બહાર બેતાલીસ ટેમ્પરેચર !  પછી શું થાય? તારા હાથની ચા પીશ એટલે તાજોમાજો ! ડોક્ટર પાસે જવાની જરૂર નથી, એવું કઈ મેજર નથી. ખોટું ટેન્શન ના કર. કુકુ નથી આયો હજુ ?''

સપનાબેન -'' હું તો એની જ રાહ જોતી હતી, આવતો હશે. સ્નેહાનો ફોન હતો ને તમારી ચિંતા કરતી 'તી, એને ગ્રોસરી લેવા જવાનું હતું એટલે લાંબી વાત ના થઇ પણ હા, મેં સાર્થક ની વાત પૂછી લીધી બંને ટચમાં છે !''

સાગરભાઈ ચા નો ઘૂંટ ભરતા બોલ્યા,'' સારી વાત છે એ તો ! કાલે સન્ડે છે, સ્નેહા ફ્રી હશે એટલે શાંતિથી વાત કરી લઈશું. મારે એક બે ઈમ્પોર્ટન્ટ ફોન કરવાના છે, હું રૂમમાં જવું છું. કુકુ આવે એટલે સાથે જમી લઈશું ને પછી વૉક પર જઈશું.''

ત્યાં તો બહારથી બુમ બરાડા સંભળાયાં, સપનાબેને બારીમાંથી બહાર જોયું તો કુકુ અને સિક્યુરીટી વાળા અબ્દુલચાચા બાખડી રહ્યા હતા. સપનાબેન તરત જ બારણું ખોલીને બહાર નીકળ્યા ને કુકુનો અવાજ સંભળાયો,'' મિયાંભાઈ તો મિયાંભાઈ જ રહેવાના...ક્યારેય નહિ સુધારવાના ! મારા બાઈકના પાર્કિંગ માટે કાયમ વાંધા હોય એમને, પપ્પાને કહે કે કોઈ સારા સિક્યોરીટીવાળાને રાખે ને ચાચાને કાઢો હવે ! જરાય બોલવાનું ભાન નથી ! ''

સપના-' પહેલાં ઘરમાં ચાલ, પછી બધી વાત !''

સપનાબેન કૂકું ને ઘરમાં લઇ ગયા અને સમજાવ્યો કે આવું ના બોલાય, તારા પપ્પાની ઉંમરના છે, મીયાભાઈ  જેવા શબ્દો શોભે આપણને ? તો એમનામાં ને આપણામાં ફેર શું ? હા, ક્યારેક ચાચા એમનું માનસિક સંતુલન ગુમાવીને એલફેલ બોલે છે પણ આપણે આપણું સંતુલન કેમ ગુમાવવાનું ?''

આજે જુન મહિનાની પહેલી તારીખ ને પાછો સોમવાર પણ હતો. સપનાબેન આજે વહેલા ઉઠી ગયા હતા. આજે સ્નેહાને ચોવીસમું વર્ષ બેસશે. બર્થડે હતો સ્નેહાનો ! સપનાબેન સ્વગત બોલી રહ્યા હતા,'' સ્નેહાના નામે આજે હવેલીમાં ઠાકોરજીને સામગ્રી પધરાવવાની છે. સ્નેહાની ફેવરીટ ચોકલેટ કેક બનાવાની છે અને એને ભાવતી રસોઈ પણ ! પછી રાત્રે સ્નેહા સાથે ફેસટાઇમ કરીને કેક કાપીશું. પાછી તરત જ ચાંપલી કહેશે,'' મારી ગીફ્ટ ક્યાં ? '' આ ત્રીજા વર્ષની ગીફ્ટ જોઇને તો એ રાજીના રેડ થઇ જશે ! કેટલું સુંદર  ગાઉન એની ધરામાસી એ ડીઝાઇન કર્યું છે ? બેબી પિંક કલર ને એમાં સ્વરોસ્કીના ડાયમંડનું વર્ક ! કેટલી સુંદર લાગશે મારી બાર્બી ડોલ ! એની ધરામાસીને સ્નેહાને શણગારવાનો ભારે શોખ ! અરે, સાત તો વાગી ગયા, હમણાં સાડા નવ વાગે તો ધરા આવી પહોચશે મંદિર જવા માટે ! પાછુ સાગરને ય નીકળવાનું ઓફિસે ! ફટાફટ બધા કામ આટોપુ તો જ પહોચી વળાશે.'' સપનાબેનની વિચારયાત્રા સાથે અનેરા ઉત્સાહથી એમના હાથ-પગ પણ સાથ આપી રહ્યા હતા. સાડા નવ થવા આવ્યા છે,બસ ધરા આવતી જ હશે. બારણું ય અધખોલું રાખ્યું છે જેથી મારે સેવામાંથી ઉભું ના થવું પડે. ઠાકોરજીની સેવામાં ધ્યાન ઓછું ને સ્નેહામાં વધારે !  ત્યાં તો મોબાઈલ રણક્યો. સપનાબેને હસતાં હસતાં ફોન ઉપાડ્યો,''  હેપીવાલા બર્થડે બેટા, સેવામાં ઠાકોરજીની સન્મુખ જ બેઠી છું. શ્રીજી, મારી સ્નેહાની બધી મનોકામના પૂરી કરજો અને ખુશ રાખજો. દીકું અમે સાંજે ફેસટાઇમ કરવાના જ હતા. આજે તું પણ ત્યાં ફ્રેન્ડસ જોડે મજા કરજે.

સ્નેહા આંખ લુછતાં કહે છે,'' હા, મમ્મા...સ્યોર ! આજે તો તું ચોકલેટ કેક બનાવીશ જોડે વેઢમી પણ !
કેટલા વર્ષો થયા તારા હાથનું ખાધે ! પણ તું જ કહેતી'તી ને કે કાંઇક મેળવવું હોય તો કાંંઇક  ગુમાવવું પણ પડે છે.

પપ્પા ને કૂકું કેમ છે ? મમ્મા, હું થોડી જલ્દીમાં છું ને મારે તને એક ગુડ ન્યુઝ પણ આપવાના છે. તો હું તને વોટ્સઅપ મેસેજ કરું છું. બાય મમ્મા !

થોડી જ વાર માં મેસેજનો ટયુન આવ્યો.

''મમ્મા, સાચું કહું તો ફોન ઉપર કહેવાની મારી હિંમત નહોતી, એટલે જ મેસેજ કર્યો છે. મેં ગઈકાલે આમિર સાથે કોર્ટમાં લગ્ન કરી લીધા છે. આમિરનો પોતાનો ગ્રોસરી સ્ટોર છે. સ્વભાવે ખુબ જ લાગણીશીલ અને રમુજી છે. તે પોતે અફઘાની છે પણ એના પેરેન્ટ્સ રાવલપીંડીમાં રહે છે. હું ખુબ ખુશ છું મમ્મા ! બસ મને તમારા બધાના આશીર્વાદની જરૂર છે. આપશો ને ?

મને માફ કરી દેજો મમ્મી-પપ્પા ! તમારી પરમીશન લઈને લગ્ન કરવાની ઈચ્છા હતી પણ એ શક્ય થવાનું નહોતું ! I am so sorry, મારી ચિંતા ન કરતા, હું ખુબ ખુશ છું. કુકુને ???

નીચે મારા ને આમિરના ફોટા મોકલી રહી છું. બે દિવસ પછી હું ફોન કરીશ. ''

મેસેજ વાંચતાં જ સપનાબેન ખુલ્લી આંખે ઢળી પડ્યા !

'' કેટલો અજીબ હોય છે

આ સબંધોનો અજવાશ,

અજવાળું હોવા છતાંય

ચહેરા ઓળખાતાં નથી. ''



નીતા શાહ